Vífilstaðarvatn

Umhverfis Vífilsstaðavatn er góður stígur sem er um 2,6 km að lengd og tekur um 35 mín. að ganga kringum vatnið en um 15 mín. að skokka. Útivistarbekkir eru meðfram stígnum þar sem tilvalið er að setjast niður og njóta náttúrunnar og fjölbreytts fuglalíf sem er við vatnið. Fræðsluskiltum hefur verið komið upp, um lífríki vatnsins, fugla við vatnið og gróður. Gamla bryggjan var endurgerð við vesturbakkann fyrir nokkrum árum til að auðvelda aðgengi fatlaðra. Umhverfi vatnsins er á öllum árstíðum eftirsóknarvert til útivistar, þaðan er hægt að ganga upp að vörðunni Gunnhildi uppi á Vífilsstaðahlíð, þar er útsýnisskilti og gott útsýni. Einnig er gönguslóði innan við vatnið upp í Grunnavatnaskarð. Vatnið og umhverfi þess var friðlýst 2007. Skrautfjöður friðlandsins er flórgoðinn, gerð var tilraun að setja út hreiðurstæði fyrir goðanna á vorin og hefur þeim fjölgað á vatninu með hverju ári. Hundar eru bannaðir í friðlandinu um varptímann, frá 15. apríl-15. ágúst. Veiðileyfi í vatnið er tímabilið 1. apríl til 15. september.