Ferðagjöfin komin í loftið

Ferðagjöfin til Íslendinga er nú aðgengileg. Ferðagjöfin er hluti af aðgerðapakka stjórnvalda og liður í því að styðja við bakið á íslenskri ferðaþjónustu í kjölfar COVID-19 heimsfaraldursins. Þannig er greinin efld samhliða því að landsmenn eru hvattir til að eiga góðar stundir á ferðalagi víðs vegar um landið. 

Á vef Ferðamálastofu www.ferdalag.is má sjá þau fyrirtæki sem hyggjast taka á móti Ferðagjöfinni, þar með talin hótel, gistiheimili, afþreyingarfyrirtæki, bílaleigur og veitingastaði auk þess sem þar er hægt að sjá ýmis tilboð í tengslum við verkefnið. Enn er hægt að skrá fyrirtæki til leiks.

Einstaklingar fæddir 2002 eða fyrr fá ferðagjöfina

Einstaklingar með lögheimili á Íslandi, íslenska kennitölu og eru fæddir árið 2002 eða fyrr fá rafræna Ferðagjöf að upphæð 5000 kr. Þeir sem ekki nýta Ferðagjöfina geta gefið hana áfram, en hver einstaklingur getur notað að hámarki 15 gjafir. Hægt er að nota Ferðagjöfina til næstu áramóta.

Við hvetjum einstaklinga til að fara inn á www.ferdalag.is og kynna sér nánar þá fjölbreyttu ferðaþjónustu sem er í boði um allt land, en nú þegar eru 400 aðilar í grunninum sem taka á móti Ferðagjöfinni. Á sama vef geta einstaklingar smellt á hnapp á forsíðunni og nálgast ferðagjöfina.