Ferðasali dagsferða - Upplýsingar og umsóknir

Leyfisbréf ferðasala dagsferða eru einungis gefin út rafrænt.

Ferðasali dagsferða skal í hvers kyns auglýsingum um starfsemi sína og á vef sínum nota myndrænt númerað auðkenni sem Ferðamálastofa útvegar.

Ferðamálastofu er heimilt að veita undanþágu frá þessu, í sérstökum tilfellum, að fenginni umsókn leyfishafa.

Óheimilt er að reka eða kynna starfsemi ferðasala dagsferða undir öðrum heitum en þeim sem fram koma á leyfisbréfi. Í umsókn um leyfi skal koma fram heiti verðandi leyfishafa ásamt öllum hjáheitum (markaðsheitum) sem fyrirhugað er að nota í starfseminni. Hægt er að bæta hjáheitum á leyfi hvenær sem er, er það gert með umsókn til Ferðamálastofu sem gefur út nýtt leyfisbréf án endurgjalds.

Hjáheiti geta, auk nafna eða heita, verið auðkenni eða lén.

Vakin er athygli á að Ferðamálastofa ber ekki ábyrgð á hjáheitum sem skráð eru á leyfisbréf leyfishafa. Vilji leyfishafar tryggja að aðrir aðilar noti ekki þau hjáheiti eða auðkenni sem skráð eru á leyfi þeirra verða þeir að skrá hjáheitin hjá fyrirtækja- eða firmaskrá og auðkenni hjá Hugverkastofunni.

Starfsemi ferðasala dagsferða skal rekin á fastri starfsstöð.
Sé þjónusta er einungis rafræn skal leyfishafi uppfylla skilyrði 6. gr. laga um rafræn viðskipti og aðra rafræna þjónustu, nr. 30/2002 varðandi upplýsintar sem koma skulu fram á vef hans.
Þjónustuveitandi skal veita greiðan og samfelldan aðgang að eftirfarandi upplýsingum um sig:

1. nafni,
2. heimilisfangi þar sem hann hefur staðfestu,
3. kennitölu,
4. póstfangi, netfangi og öðrum þeim upplýsingum sem gera mögulegt að hafa samband við hann á greiðan hátt,
5. virðisaukaskattsnúmeri þjónustuveitanda,
6. þeirri opinberu skrá sem hann er skráður hjá, svo sem hlutafélagaskrá, samvinnufélagaskrá eða firmaskrá, og
7. leyfi og eftirlitsaðila ef starfsemi hans er háð leyfum.

Sjá einnig vef Neytendastofu.  

Ábyrgðartryggingunni er ætlað að tryggja viðskiptavini leyfishafa, á meðan á ferð stendur, verði þeir fyrir líkamstjóni eða tjóni á eigum sem rekja má til sakar leyfishafa.

Tryggingin þarf að vera í gildi á gildistíma leyfisins. Staðfestingu á tryggingu þarf að leggja fram með umsókn.

Öllum sem framkvæma eða hyggjast framkvæma skipulagðar ferðir innan íslensks yfirráðasvæðis er skylt að hafa skriflegar öryggisáætlanir, á íslensku og ensku, fyrir hverja tegund ferðar.

Skylda til gerðar öryggisáætlana nær jafnt til innlendra sem erlendra ferðaþjónustuaðila.

Óheimilt er að bjóða ferð til sölu eða kynna á nokkurn hátt ef öryggisáætlun liggur ekki fyrir. Ferðasölum dagsferða, sem selja eða kynna ferðir fyrir aðra, ber að ganga úr skugga um að öryggisáætlanir séu til staðar áður en ferðir eru teknar til sölu.

Öryggisáætlanir eru ekki meðal skilyrða fyrir leyfisveitingu og þarf því ekki að skila þeim með umsókn en Ferðamaálstofa getur hvenær sem er kallað eftir þeim.

Nánari upplýsingar um öryggisáætlanir og gerð þeirra er að finna hér.

Skilyrði fyrir veitingu leyfis er að umsækjandi eða forsvarsmaður umsækjanda, ef hann er lögaðili, uppfylli eftirfarandi skilyrði:

1. hafi búsetu innan aðildarríkja Evrópska efnahagssvæðisins eða stofnsamnings Fríverslunarsamtaka Evrópu eða í Færeyjum,
2. sé lögráða, hafi forræði á búi sínu og hafi ekki á síðustu fjórum árum í tengslum við atvinnurekstur hlotið dóm fyrir refsiverðan verknað samkvæmt lögum um Ferðamálastofu, almennum hegningarlögum eða lögum um hlutafélög, einkahlutafélög, bókhald, ársreikninga, gjaldþrotaskipti o.fl. eða staðgreiðslu opinberra gjalda,
3. hafi skráð starfsemi sína hjá ríkisskattstjóra,
4. leggi fram staðfestingu um ábyrgðartryggingu frá vátryggingafélagi sem hefur starfsleyfi á Evrópska efnahagssvæðinu.
   
   Ferðamálastofu er í tengslum við leyfisveitingu, heimilt að óska frekari gagna sem nauðsynleg eru til að taka afstöðu til umsóknar. (Sjá lög 96/2018 um Ferðamálastofu).

Nauðsynlegt er að fara vel yfir að öll vottorð, staðfestingar og önnur gögn sem fylgja eiga umsókn séu til staðar áður en umsókn er fyllt út. Einnig er nauðsynlegt að hafa gilt debit- eða kreditkort vegna greiðslu umsóknargjalds við hendina. Þau fylgigögn sem umsækjandi þarf sjálfur að afla hlaða upp í umsóknarferli eru:

Einstaklingar

• Staðfesting á skráningu á launagreiðendaskrá RSK
• Staðfesting á ábyrgðartryggingu vátryggingafélags
• Ef einstaklingur rekur starfsemi undir öðru nafni en sínu eigin þarf að skrá heitið hjá firmaskrá RSK og láta staðfestingu þess efnis fylgja umsókn

Lögaðilar

• Staðfest vottorð úr fyrirtækjaskrá
• Staðfesting á skráningu á launagreiðendaskrá RSK
• Staðfesting á ábyrgðartryggingu vátryggingafélags
• Athugið, að einungis skráður prókúruhafi hjá Skattinum getur sótt um fyrir hönd lögaðila

Önnur vottorð

Annarra vottorða sem lög kveða á um að fylgi umsókn er aflað sjálfkrafa. 

Einstaklingur eða lögaðili?

Leyfi er gefið út á nafn þess einstaklings eða lögaðila sem tilgreindur er sem umsækjandi í umsókninni, eftir útgáfu leyfis verður sá aðili leyfishafi. 

Leyfisgjald:

Greiðsla fyrir leyfi er hluti af umsóknarferlinu. Gjald fyrir leyfi ferðasala dagsferða er 20.000 kr. Gætið þess að hafa gilt debit- eða kreditkort tiltækt.

Einstaklingar sem sækja um leyfi skrá sig inn á sínum skilríkjum.

Ferðasali dagsferða, einstaklingar

Einungis prókúruhafar geta verið forsvarsmenn lögaðila gagnvart Ferðamálastofu, sá prókúruhafi félags sem skrá á sem forsvarsmann verður að skila inn leyfisumsókn. Umsóknin er opnuð á hlekknum hér að neðan, prókúruhafi skráir sig inn á sínum rafrænum skilríkjum, velur félagið sem sækja á um leyfi fyrir og opnar umsóknina til útfyllingar.     

Ferðasali dagsferða, lögaðilar

Umsækjanda ber að kanna hvort önnur leyfi eru nauðsynleg í tengslum við starfsemina.

• Samgöngustofa sér um útgáfu leyfa varðandi fólksflutninga hvort sem er á landi, í lofti eða á sjó, ám og vötnum.
• Sýslumenn sjá um útgáfu leyfa fyrir veitingastaði og gististaði.
• Heilbrigðiseftirlit gefa út rekstrarleyfi fyrir hestaferðir og ber að tilkynna slíka starfsemi til Matvælastofnunar (MAST), sjá www.mast.is Einnig veita heilbrigðiseftirlit starfsleyfi fyrir gististaði, veitingastaði og almenningssalerni.
• Umhverfisstofnun veitir leyfi vegna aksturs utan vega, framkvæmda innan friðlanda, ljósmynda- og kvikmyndatöku á svæðum sem heyra undir UST, hreindýraveiða og fuglaveiða
• Lögreglustjórar veita m.a. skotvopnaleyfi og leyfi fyrir fallhlífastökki
• Fiskistofa veitir leyfi vegna frístundaveiða
• Náttúruverndarstofnun veitir leyfi og gerir saminga vegna starfsemi innan Vatnajökulsþjóðgarðs og Snæfellsjökulsþjóðgarðs
• Þjóðgarðurinn á Þingvöllum veitir leyfi og gerir samninga vegna starfsemi innan þjóðgarðsins
• Vinnumálastofun veitir m.a. atvinnuleyfi fyrir starfsmenn sem koma frá löndum utan Evrópusambandsins og EFTA
• Sveitarféölgin veita rekstrar-, bygginga- og stöðuleyfi