Hamrahamrar (hvíta leiðin)

Hamrahamrar er samfellt klettabelti fyrir ofan tjaldsvæðið á Hömrum. Áin Brunná rennur um skorning í hömrunum og áfram niður að tjaldsvæðinu að Hömrum þar sem hún myndar skemmtilegar tjarnir og leikjasvæði og síðan áfram í gegnum Kjarnaskóg. Gönguleiðin liggur nálægt ánni, fer í gegnum skóg, móa og upp að skátaskálanum Gamla. Nokkrir valkostir eru á gönguleiðum t.d. frá Kjarnaskógi eða tjaldsvæðinu að Hömrum. Þaðan er gengið eftir stígakerfi skógarins, þrengri skógarstíga, jeppaslóða og kindagötum upp að Gamla. Efsti hluti leiðarinnar liggur um mólendi og er nokkuð brattur. Vegalengd fram og til baka er um 8 km ef byrjað er hjá Kjarnakoti í Kjarnaskógi (styttra frá Hömrum). Gönguhækkun er um 230 m. Leiðin er greiðfær og liggur að mestu um vel gróið land. Gangan ætti að taka um 1-2 klukkustundir í heildina. Gott er að vera í góðum skóm og klæða sig eftir veðri. Hafa með hressingu, eins er gott er að hafa meðferðis göngustafi. Athugið að leiðin er bæði notuð af gangandi og hjólandi. Skátaskálinn er læstur og nýtist í skátastarfi en sjálfsagt er að nota pallinn eða skjól við húsið sem áningarstað svo lengi sem það truflar ekki skátastarfið.