Reykjavíkurhringur Hjólaleið

Hjólaleiðin hefst við Hörpu. Hjólað er suður Lækjargötu, fram hjá Tjörninni og Hljómskálagarðinum. Gæta þarf að gangandi vegfarendum ef hjólað er á gangstéttinni. Farið er yfir göngubrúna sem liggur yfir Hringbraut og hjólað í vesturátt, yfir útfallið úr Vatnsmýrinni og í áttina að Þjóðminjasafninu. Þaðan er beygt til vinstri inn á Suðurgötuna og hjólað í átt að Skerjafirðinum. Við enda flugbrautarinnar er hjólastígur sem er fylgt áfram eftir Einarsnesi og síðan áfram að gömlu olíustöðinni í Skerjafirði þar sem hjólastígurinn liggur í gegn. Síðan er hjólað til austurs eftir stígnum áfram í áttina að Nauthólsvík. Þegar komið er að Nauthólsvík er haldið áfram austur með Fossvogi og yfir brúna yfir Kringlumýrarbraut. Haldið er áfram í gegnum Fossvoginn að göngum sem liggja undir Breiðholtsbraut og inn í Elliðaárdal. Beygt er til vinstri og hjólað meðfram Elliðaánum og í gegnum göngin undir Ártúnsbrekku og áfram meðfram Elliðaánum þar til komið er að rauðu göngu- og hjólabrúnni niður við ósana. Stígnum í Naustavogi er svo fylgt áfram meðfram sjónum og síðan beygt upp Kleppsmýrarveg og þar yfir Sæbrautina og hjólað eftir Skeiðarvogi þangað til komið er inn á stíg sem liggur meðfram Suðurlandsbraut. Stígnum er fylgt til vesturs, hjólað yfir gatnamótin á Kringlumýrarbraut og áfram meðfram Suðurlandsbraut þar til beygt er til hægri niður Katrínartún. Þegar komið er að Sæbrautinni er farið yfir hana og niður á stíginn meðfram sjónum, beygt til vinstri og svo hjólað aftur að upphafsstað við Hörpu.