Neshringurinn Gönguleið

Fólk á öllum aldri gengur sér til heilsubótar um Seltjarnarnes og nýtur óviðjafnanlegs útsýnis og náttúrunnar. Þessi 5 km hringur liggur meðfram Nesinu og hefst við bílastæðið hjá Gróttu. Gengið er í suðurátt meðfram sjónum og áfram fram með Bakkatjörn. Rétt við golfvöllinn er sveigt til vinstri og inn á malbikaðan göngu- og hjólastíginn sem liggur með suðurströnd Nessins. Stígurinn er genginn austur og yfir Nesið, fram hjá sundlauginni og Eiðistorgi allt þar til komið er að norðurströndinni. Þar er sveigt til vinstri og gengið vestur á bóginn að bílastæðinu við Gróttu. Tilvalið er að koma við hjá listaverkinu Kviku eftir listakonuna Ólöfu Nordal sem stendur á Kisuklöppum við fjöruna rétt áður en komið er að Gróttu og dýfa tánum ofan í. Í laugina rennur forkælt jarðhitavatn úr borholum Seltjarnarness, en vatnið hefur einstaka efnasamsetningu og þykir hafa heilnæma eiginleika.