Steinmenn Gönguleið

Steinmenn eru klettastapar á jökulsorfnum klöppum ofan við Kjarnaskóg. Hægt er að velja um nokkrar leiðir en sú algengasta er að ganga sem beinast upp frá Kjarnaskógi, að Gamla (skátaskáli) og þaðan upp stikaða kindargötu um brattan móa og hæðir. Gangan hentar flestum en er nokkuð brött á köflum og er hækkunin um 473 metra y.s. Frá Steinmönnum er mikið og fallegt útsýni í allar áttir. Á kortinu eru sýndar tvær útgáfur að gönguleið, styst er að ganga beinustu leiðina fram og tilbaka en fyrir þá sem vilja meiri tilbreytingu þá er hægt að fara til norðurs fyrir neðan Gamla, sú leið er ekki eins brött, en lengri. Sú leið kallast Hamrahamrar og liggur fyrir neðan hamrabelti og um skógarstíga aftur að byrjunarreit. Hægt er að velja fleiri úgáfur af leiðum en kortið sýnir. Þær eiga það þó flestar sameiginlegt að byrja í Kjarnaskógi eða við tjaldsvæðið á Hömrum, á báðum stöðum eru næg bílastæði og snyrtingar. Vegalengd fram og til baka er um 8-9 km ef byrjað er hjá Kjarnakoti í Kjarnaskógi. Gönguhækkun er um 400 m. Leiðin er greiðfær og liggur að mestu um vel gróið land. Gangan ætti að taka um 4 klukkustundir í heildina. Nauðsynlegt er að vera í góðum skóm og klæða sig eftir veðri. Hafa með vatn og hressingu, eins er gott er að hafa meðferðis göngustafi.