Vífilsstaðavatn Gönguleið

Umhverfis Vífilsstaðavatn liggur greiðfær stígur sem er um 2,6 km að lengd. Það tekur um 35 mín. að ganga kringum vatnið en um 15 mín. að skokka. Útivistarbekkir eru meðfram stígnum og tilvalið tylla sér þar á leiðinni og njóta náttúrunnar og fjölbreytts fuglalífs. Fræðsluskiltum hefur verið komið upp þar sem lesa má sér til um lífríki vatnsins, fugla og gróður svæðisins. Gamla bryggjan við vesturbakkann var lagfærð fyrir nokkrum árum til að auðvelda aðgengi fatlaðra. Umhverfi vatnsins er eftirsóknarvert til útivistar árið um kring. Frá vatninu er hægt að ganga upp að vörðunni Gunnhildi í Vífilsstaðahlíð þaðan sem er gott útsýni og hægt að glöggva sig á kennileitum af útsýnisskífu. Einnig er gönguslóði innan við vatnið upp í Grunnavatnaskarð. Vatnið og umhverfi þess var friðlýst árið 2007. Skrautfjöður friðlandsins er flórgoðinn. Gerð var tilraun að setja út hreiðurstæði fyrir goðana á vorin og hefur þeim fjölgað á vatninu með hverju ári í kjölfarið. Hundar eru bannaðir í friðlandinu um varptímann, frá 15. apríl til 15. ágúst. Veiðileyfi í vatninu er hægt að kaupa frá 1. apríl til 15. september. Vífilsstaðavatn er í Heiðmörk. Heiðmörk er í umsjón Skógræktarfélags Reykjavíkur sem eru frjáls félagasamtök. Nánari upplýsingar og kort sem sýna fleiri leiðir má finna á heidmork.is.