18% fleiri gistinætur hótela í apríl

Hagstofan hefur birt tölur um gistinætur á hótelum í apríl. Sem fyrr vekur Hagstofan athygli á að tölurnar ná eingöngu til hótela sem opin eru allt árið. Til þessa flokks gististaða teljast þannig hvorki gistiheimili né hótel sem eingöngu eru opin yfir sumartímann.

Fjölgun um 18%

Gistinætur á hótelum í apríl voru 155.930 sem er 18% aukning miðað við apríl 2013. Gistinætur erlendra gesta voru 79% af heildarfjölda gistinátta í mánuðinum en þeim fjölgaði um 19% frá sama tíma í fyrra á meðan gistinóttum Íslendinga fjölgaði um 15%.