62.700 ferðamenn í janúar
Um 62.700 erlendir ferðamenn fóru frá landinu í janúar síðastliðnum samkvæmt talningum Ferðamálastofu í Flugstöð Leifs Eiríkssonar eða 16.100 fleiri en í janúar á síðasta ári.
Aukningin nemur 34,5% milli ára. Ferðaárið fer því vel af stað en ferðamenn hafa aldrei mælst fleiri í janúar frá því mælingar hófust.
Bretar og Bandaríkjamenn helmingur ferðamanna
Um 78% ferðamanna í janúar árið 2015 voru af tíu þjóðernum. Bretar voru fjölmennastir eða 34,6% af heildarfjölda en næstir komu Bandaríkjamenn (14,9%).
Þar á eftir fylgdu Frakkar (5,1%), Þjóðverjar (4,7%), Japanir (3,4%), Danir (3,4%), Kínverjar (3,4%), Svíar (3,2%), Norðmenn (3,1%), og Kanadamenn (2,4%).
Af einstaka þjóðernum fjölgaði Bretum, Bandaríkjamönnum og Frökkum mest milli ára en 5.110 fleiri Bretar komu í janúar í ár en í sama mánuði í fyrra, 2.607 fleiri Bandaríkjamenn og 1.225 fleiri Frakkar. Þessar þrjár þjóðir báru að stórum hluta uppi aukninguna í janúar milli ára eða um 55,5% af heildaraukningu.
Fjöldi ferðamanna þrefaldast í janúar á síðustu fimm árum
Þegar litið er til fjölda ferðamanna í janúarmánuði frá því að Ferðamálastofa hóf talningar á Keflavíkur- flugvelli má sjá mikla aukningu ferðamanna síðustu árin. Fjöldi ferðamanna hefur t.a.m. nærri þrefaldast í janúar á síðustu fimm árum og munar þá mestu um mikla fjölgun Breta en þeir hafa fimmfaldast frá árinu 2010. Ferðamönnum frá öðrum markaðssvæðum hefur ennfremur fjölgað umtalsvert, þannig hafa N-Ameríkanar ríflega fjórfaldast, ferðamenn frá Mið- og S-Evrópu nærri þrefaldast og ferðamenn frá öðrum markaðssvæðum nærri þrefaldast. Norðurlandabúum hefur hins vegar fjölgað í minna mæli.
Ferðir Íslendinga utan
Um 27 þúsund Íslendingar fóru utan í Janúar síðastliðnum eð 1.800 fleiri en árið 2014. Um er að ræða 7% fleiri brottfarir en í janúar 2014.
Nánari upplýsingar
Talningar Ferðamálastofu ná yfir allar brottfarir frá landinu um Leifsstöð. Skiptingu milli landa má sjá í töflunni hér að neðan og nánari upplýsingar undir liðnum Tölur og útgáfur / Fjöldi ferðamanna hér á vefnum.
