Fjöldi erlendra ferðamanna í september

Alls fóru 40.863 erlendir gestir úr landi um Leifsstöð í septembermánuði nýliðnum. Um er að ræða 3,8% færri brottfarir erlendra gesta en í sama mánuði árið 2009 en einungis tvívegis áður hafa þó ferðamenn verið fleiri í september, eða árin 2008 og 2009.

Þegar litið er til einstakra markaðssvæða má sjá verulega fjölgun frá Norður Ameríku (+22,6%) og nokkra fjölgun frá löndum innan og utan Evrópu sem eru flokkuð saman undir ?Annað? (+7,1%). Bretum fækkar hins vegar umtalsvert eða um 22,6%, gestum frá Mið- og Suður Evrópu um 13,9% og Norðurlandabúum um 6,2%.

Frá áramótum hafa 385.100 erlendir gestir farið frá landinu eða 10.400 færri en á sama tímabili árið áður. Fækkunin nemur 2,6% milli ára. Fækkun hefur verið frá öllum mörkuðum nema Norður- Ameríku en þaðan hefur verið fjölgun upp á 13,5%.

Veruleg fjölgun er í brottförum Íslendinga í september en í ár fóru 27.808 Íslendingar frá landinu en í sama mánuði árinu áður fóru tæplega 22 þúsund úr landi. Fjölgunin nemur 28,2% milli ára. Frá áramótum hafa 24.500 fleiri Íslendingar farið utan í ár en á sama tímabili í fyrra.