Fógetastígur í Gálgahrauni Gönguleið

Í Garðabæ er ákaflega falleg gönguleið um Gálgahraun sem kallast Fógetastígur. Lagt er af stað frá bílastæðinu við hringtorgið þar sem Vífilstaðavegur og Hraunholtsbraut mætast. Við upphaf göngunnar er fræðsluskilti um söguna og fornar leiðir sem fróðlegt er að lesa. Gangan liggur í hring og er fyrst gengið með fallega vogskorinni ströndinni og að Gálgaklettum. Í Gálgahrauni leynast margir misjafnlega stórir hellisskútar, bollar, gjár og þess háttar skúmaskot. Þegar komið er að Lambhúsatjörn sveigir stígurinn til suðurs og síðan er gengið í átt að upphafsstað. Vegalengd um 5 km. Umrætt svæði er nyrsti hluti svokallaðra Búrfellshrauna sem runnu frá eldstöðinni Búrfelli fyrir rúmum 7000 árum. Gálgahraun var friðlýst árið 2009 og er hraunið að mestu eins og það var þegar það rann og eru jarðmyndanir, gróðurfar og fuglalíf forsendur friðlýsingarinnar.