Málþing um viðhorf Íslendinga - Beint streymi
Í dag gangast Ferðamálastofa og Rannsóknarmiðstöð ferðamála fyrir málþingi á Grand Hótel Reykjavík þar sem meðal annars verða kynntar nýjar niðurstöður rannsóknar um viðhorf Íslendinga til ferðafólks og ferðaþjónustu, bæði á landsvísu og eftir einstaka landshlutum. Markmiðið var m.a. að leita eftir vísbendingum um það hvort landsmenn finni fyrir álagi vegna ferðamanna í heimabyggðinni.
Skráningu er lokið en hægt að fylgjast með beinu streymi á slóðinni hér að neðan:
Framhald fyrri rannsókna
Ferðamálastofa fól Rannsóknamiðstöð ferðamála (RMF) að hafa umsjón með rannsókninni en um er að ræða framhald rannsókna sem voru framkvæmdar á landsvísu 2014, 2017 og 2019 auk stuttra kannana 2021-2022 sem voru gerðar fyrir Jafnvægisás ferðamála. Þess á milli hafa verið gerðar rannsóknir á nokkrum þéttbýlisstöðum.
Safna samanburðarhæfum gögnum
Rannsóknin, sem er skilgreind í rannsóknaráætlun Ferðamálastofu 2023- 2025, er liður í vöktun á viðhorfum heimamanna og hluti af reglubundinni söfnun hins opinbera á samanburðarhæfum gögnum og greiningu á viðhorfum Íslendinga til ferðaþjónustu og ferðamennsku. Jafnframt tekur rannsóknin mið af þeim opinberu markmiðum að ferðaþjónusta hafi jákvæð áhrif á nærsamfélagið og auki lífsgæði.
Nýtist víða
Verkefnið safnar gögnum fyrir mælikvarða Jafnvægisáss ferðamála og fyrir markmið stjórnvalda um að landsmenn hafi jákvætt viðhorf til ferðaþjónustunnar, auk þess sem gögnin nýtast í alþjóðlegri tölfræði, svo sem við sjálfbærnivísa aðildarlanda Ferðamálaráðs Evrópu (ETC).
Fjögur erindi um ýmsar áskoranir
Auk kynningar á umræddri rannsókn eru á dagskránni fjögur erindi sem öll nálgast viðfangsefni málþingsins frá ólíkum sjónarhornum. Meginþemað eru þær ýmsu áskoranir sem felast í áhrifum ferðaþjónustu á nærsamfélagið og þjóðfélagið í heild.
Dagskrá
14:00 -14:10 Setning – Arnar Már Ólafsson, ferðamálastjóri
14:10-14:40
- Viðhorf Íslendinga til ferðamanna og ferðaþjónustu: kynning á niðurstöðum rannsóknar Ferðamálastofu meðal landsmanna
Eyrún Jenný Bjarnadóttir, sérfræðingur hjá RMF
14:50– 15:30
- Hvernig þróum við áfangastað í sátt við íbúa
Inga Hlín Pálsdóttir, Markaðsstofa höfuðborgarsvæðisins.
- Samfélagsleg áhrif ferðaþjónustu – ávinningur og áskoranir
Bjarni Guðmundsson, Samtök sunnlenskra sveitarfélaga
- Hafa ferðamenn áhrif á náttúruna
Inga Dóra Hrólfsdóttir, Umhverfisstofnun
- Hverfur íslenskan úr ferðaþjónustunni? Mikilvægi þjóðtungunnar í upplýsingamiðlun
Eiríkur Rögnvaldsson, fv. prófessor í íslensku
15:30 – 16:00 Umræður með frummælendum
Umræðustjórar: Arnar Már Ólafsson ferðamálastjóri og Guðrún Þóra Gunnarsdóttir, forstöðumaður RMF