Mikilvægar upplýsingar vegna opnunar Grindavíkur fyrir almennri umferð mánudaginn 21. október
Líkt og tilkynnt hefur verið, verður Grindavíkurbær opinn fyrir almennri umferð frá og með kl. 6 að morgni, mánudaginn 21. október.
Gera má ráð fyrir að áhugi verði á að sjá og upplifa hvaða áhrif jarðskjálftar og eldgos hafa haft á svæðið. Það á bæði við um almenning en jafnframt ferðaþjónustuaðila sem hafa hug á að bjóða upp á ferðir um svæðið og bæinn.
Sýnum ábyrgð og virðingu
Við beinum því til ferðaþjónustuaðla að upplýsa gesti sína og sýna ábyrga ferðahegðun í ferðum um bæinn. Mikilvægt er að skipuleggja og framkvæma ferðirnar af virðingu við samfélagið á svæðinu. Á það bæði við um markaðs- og kynningarefni og ferðirnar sjálfar. Gætum varkárni og tryggjum öryggi gesta og starfsfólks í hvívetna.
Tillitssemi við íbúa
Sýnum íbúum tillitssemi, göngum ekki um lóðir eða kíkjum á glugga yfirgefinna húsa svo dæmi séu tekin. Þá þarf að taka tillit til þess þegar farið er um svæðið í Efrahópi, þar sem hraun rann yfir í janúar, að þar misstu fjölskyldur aleigu sína.
Salernisaðstaða
Salernisaðstaða er ekki til staðar í Grindavík nema á þeim veitingastöðum sem eru opnir. Þeir eru enn sem komið er ekki margir.
Upplýsingabæklingar á íslensku og ensku
Hér að neðan eru tenglar á upplýsingabæklinga fyrir gesti og ferðaþjónustuaðila, bæði á íslensku og ensku. Þá er hægt að prenta út og dreifa. Bendum einnig á að fylgjast með uppfærðum leiðbeiningum inn á www.grindavik.is, www.visitreykjanes.is og www.safetravel.is.