43% fleiri ferðamenn í febrúar

Fjörutíu þúsund erlendir ferðamenn fóru frá landinu í febrúar síðastliðnum samkvæmt talningum Ferðamálastofu eða 12 þúsund fleiri en í sama mánuði árið 2012. Um er að ræða 43,2% aukningu milli ára.

Þreföld aukning ferðamanna frá 2003 til 2013

Þegar litið er til fjölda ferðamanna í febrúarmánuði á ellefu ára tímabili (2003-2013) má sjá að jafnaði 12,8% aukningu milli ára frá árinu 2003. Ferðamönnum hefur fjölgað úr 13 þúsundum í 40 þúsund frá árinu 2003, sem er meira en þreföldun.

Bretar 40% ferðamanna

Af einstaka þjóðernum voru flestir ferðamenn í febrúar frá Bretlandi (39,9%). Ferðamenn frá Bandaríkjunum (13,4%), Noregi (8,0%), Þýskalandi (5,7%), Frakklandi (4,2%) og Danmörku (4,0%) fylgdu þar á eftir. Samtals voru þessar sex þjóðir tæplega þrír fjórðu ferðamanna í febrúar.

Af einstaka þjóðum fjölgaði Bretum, Bandaríkjamönnum og Þjóðverjum mest milli ára í febrúar. Þannig komu 5.448 fleiri Bretar en í fyrra, 1.478 fleiri Bandaríkjamenn og 1.199 fleiri Þjóðverjar.

Veruleg aukning frá öllum markaðssvæðum

Þegar litið er til einstakra markaðssvæða má sjá 56,0% aukningu frá Mið- og Suður Evrópu, 51,8% aukningu frá Bretlandi, 37,7% frá Norður Ameríku, 16,6% frá Norðurlöndunum og 45,2% frá löndum sem eru flokkuð undir ,,annað“.

Ferðamenn frá áramótum

Það sem af er ári hafa 73.269 erlendir ferðamenn farið frá landinu eða 19 þúsund fleiri en á sama tímabili í fyrra. Um er að ræða 35,5% aukningu milli ára. Veruleg aukning hefur verið frá flestum mörkuðum; Bretum hefur fjölgað um 48,8%, ferðamönnum frá Mið- og S-Evrópu um 40,2%, N-Ameríkönum um 32,6% og ferðamönnum frá öðrum mörkuðum um 38,4%. Norðurlandabúum hefur hins vegar fjölgað minna eða um 8,3%.

Ferðir Íslendinga utan

Tæplega 21 þúsund Íslendingar fóru utan í febrúar síðastliðnum, 400 færri en í febrúar árið 2012. Frá áramótum hafa 44.089 Íslendingar farið utan, 1,2% færri en árinu áður en þá fóru 44.629 utan.

Nánari upplýsingar

Talningar Ferðamálastofu ná yfir allar brottfarir frá landinu um Leifsstöð. Skiptingu milli landa má sjá í töflunni hér að neðan og nánari upplýsingar undir liðnum Tölur og útgáfur/Fjöldi ferðamanna hér á vefnum. Eins og fram kom í frétt um janúartölur voru þær tölur birtar með fyrirvara en hafa þær nú verið leiðréttar.

Nánari upplýsingar veitir Oddný Þóra Óladóttir, rannsóknastjóri oddny@ferdamalastofa.is