83.900 ferðamenn í mars
Tæplega 84 þúsund erlendir ferðamenn fóru frá landinu í mars síðastliðnum samkvæmt talningum Ferðamálastofu í Flugstöð Leifs Eiríkssonar eða um 17.700 fleiri en í mars á síðasta ári. Aukningin nemur 26,8% milli ára.
Ferðamönnum heldur þvi áfram að fjölga en í janúar og febrúarmánuði mældist aukning milli ára um 34%.
Helmingur frá Bretlandi og Bandaríkjunum
78,8% ferðamanna í nýliðnum marsmánuði voru af tíu þjóðernum. Bretar voru fjölmennastir eða 33,6% af heildarfjölda en næstfjölmennastir voru Bandaríkjamenn eða 17,2% af heildarfjölda. Þar á eftir fylgdu Þjóðverjar (6,0%), Frakkar (4,7%), Danir (3,8%), Norðmenn (3,7%), Svíar (2,7%), Kanadamenn (2,6%), Kínverjar (2,2%) og Hollendingar (2,2%).
Af einstaka þjóðernum fjölgaði Bretum, Bandaríkjamönnum og Þjóðverjum mest milli ára en 7.049 fleiri Bretar komu í mars í ár en í sama mánuði í fyrra, 2.174 fleiri Bandaríkjamenn og 1.657 fleiri Þjóðverjar. Þessar þrjár þjóðir báru að stórum hluta uppi aukninguna í mars milli ára eða um 61,4% af heildaraukningu.
Þróun á tímabilinu 2002-2015
Þegar þróunin er skoðuð frá því Ferðamálastofa hóf talningar á Keflavíkur-flugvelli sést hvað ferða-mönnum hefur fjölgað mikið í mars og þá einkum síðastliðin fjögur ár. Mismikil fjölgun eða fækkun hefur hins vegar átt sér stað eftir því hvaða markaðs-svæði á í hlut. Aukning Breta er mest áberandi enda langfjölmennastir í mars-mánuði en þeir hafa fimmfaldast frá árinu 2011. Fjölgun hefur ennfremur verið umtalsverð frá öðrum markaðssvæðum síðustu fjögur árin. Þannig hafa ferðamenn frá N-Ameríku fjórfaldast, ferðamenn frá Mið- og S-Evrópu meira en tvöfaldast og frá löndum sem flokkast undir ,,önnur markaðssvæði meira en fjórfaldast. Norðurlandabúum hefur hins vegar fjölgað í minna mæli.
Um 217 þúsund ferðamenn frá áramótum
Það sem af er ári hafa 217.092 erlendir ferðamenn farið frá landinu eða 51.800 fleiri en á sama tímabili í fyrra. Um er að ræða 31,4% aukningu milli ára. Veruleg aukning hefur verið frá flestum mörkuðum; Mið- og S-Evrópubúum hefur fjölgað um 44,3%, Bretum um 30,7%, N-Ameríkönum um 26,5%, Norðurlandabúum um 10,0% og ferðamönnum frá öðrum mörkuðum um 42,4%.
Ferðir Íslendinga utan
Um 33 þúsund Íslendingar fóru utan í mars síðastliðnum eða 8.300 fleiri en árið 2014. Um er að ræða 34,1% fleiri brottfarir en í mars 2014.
Nánari upplýsingar
Talningar Ferðamálastofu ná yfir allar brottfarir frá landinu um Leifsstöð. Skiptingu milli landa má sjá í töflunni hér að neðan og nánari upplýsingar undir liðnum Tölur og útgáfur / Fjöldi ferðamanna hér á vefnum.
