Fjöldi bifreiða að Fjallabaki

Í ljósi mikilvægis Fjallabaks fyrir ferðaþjónustuna voru gerðar umfangsmiklar rannsóknir á umferð að Fjallabaki sumarið 2011 innan verkefnis sem kallast „Áætlun um ferðamennsku á miðhálendi Íslands“. Farin var sú leið að nota tólf teljara til að meta fjölda bifreiða sem fara ákveðna leið og tvo teljara til að meta fjölda göngufólks. Bifreiðar voru taldar á öllum aðkomuleiðum að Fjallabaki, þ.e. á aðkomuleiðum að Fjallabaksleið syðri, F210 og að Fjallabaksleið nyrðri, F208 og að auki á mörgum leiðum innan svæðisins. Göngufólk var talið á gönguleiðinni Laugavegurinn á göngubrúnni yfir Kaldaklofskvísl og voru niðurstöður þeirrar rannsóknar birtar í skýrslunni Laugavegurinn: Gönguleiðin milli Landmannalauga og Þórsmerkur - Fjöldi göngufólks 2011 til 2013 (Rögnvaldur Ólafsson, 2014). Frá árinu 2011 hefur fjórum bifreiðarteljurum verið bætt við og eru því talningarstaðirnir sem lýst er í þessari skýrslu orðnir 16.